పుణ్యక్షేత్రాల్లో ఒకటైన మేల్కొటై, తిరునారాయణపురంలో రామానుజ దయాపాత్ర ఆధ్వర్యంలో ఉత్సవాలను ఆగస్టు 27వ తేదీ నుంచి 30వ తేదీ వరకు వైభవంగా నిర్వహిస్తున్నారు. ఈ ఉత్సవాల సందర్భంగా ప్రబంధ సేవాకాలంతోపాటు పండితులతో ఉపన్యాసాలను కూడా ఏర్పాటు చేశారు. ఆధ్యాత్మిక విషయాలతోపాటు, అందరినీ భక్తిమార్గంవైపు తీసుకువెళ్ళాలనే ఉద్దేశ్యంతో ఏర్పాటు చేసిన ‘పరంపర’ వెబ్‌సైట్‌ ద్వారా ఇండియా, అమెరికాలోనూ ఇతర దేశాల్లో ఉన్న ఎంతోమందికి స్తోత్రాలను, దివ్య ప్రబంధాలను నేర్పిస్తున్న శ్రీ ఉ. వే. చక్రవర్తి రంగనాధన్‌ స్వామి కూడా ఈ ఉత్సవాల్లో తన ఉపన్యాసాన్ని వెలువరించనున్నారు. ఆగస్టు 28వ తేదీన రామానుజదయాపాత్రం పేరుతో ఆయన ఉపన్యాసాన్ని నిర్వాహకులు ఏర్పాటు చేశారు. ఆయనతోపాటు పలువురు విద్వాంసులు కూడా ఉపన్యాసాలను చేయనున్నారు. 27వ తేదీన తిరు ఆయిరప్పడి అవతారికై పేరుతో శ్రీ. ఉ.వే. విజయరాఘవచారియార్‌, 28వ తేదీన నావల్‌పాకం వాసుదేవచారియార్‌, 29వ తేదీన సొగటూర్‌ రామానుజచారియార్‌, వడువూర్‌ వీరరాఘవచారియార్‌, 30వ తేదీన నావల్‌పాకం కణ్ణమాచారియార్‌ తదితరులు ఈ ఉత్సవాల్లో ఉపన్యాసాలను చేయనున్నారు. భక్తులంతా ఈ ఉత్సవాలకు హాజరై జయప్రదం చేయాల్సిందిగా నిర్వాహకులు కోరుతున్నారు.
